“ميران حسين” تكتب: 《ضد المنطق》.. أوعي تتجوزي

الجواز منظومة إجتماعية مفهومها خاطئ جداً للأسف … إحنا فاهمين الجواز غلط أو بالأصح فهمونا الجواز بطريقة غلط

فهمونا إن الراجل ماكينة ATM يجمع فلوس الصبح وباقى اليوم مأنتخ والست عليها كل حاجة

فهمونا إن الست لازم تستحمل مهما حصل لإن الست مالهاش غير جوزها وبيتها وعيالها وكأنها يوم مامضت على عقد الجواز مضت على عقد إستعبادها

علشان كده يوم ماتفكري تتجوزي :

1- أتجوزي راجل وأبعدي عن أشباه الرجال إللى مفاهيمهم مغلوطة فى كل شئ مش الجواز بس

2- أتجوزي راجل فاهم يعني إيه بيت وجواز مش راجل شايف إن مسؤليته الوحيدة إنه يجيب فلوس للبيت وبس

3- أتجوزي راجل يساعدك فى البيت مش واحد أكبر طموحه يأكل حلة محشي علي الغدا طلع عينك فيها شراء وسلق ولف عشان يأكلها في ربع ساعة وفى الآخر يقولك تعبان ويداخل ينام ويسيبلك المواعين تضرب تقلب فى الحوض ولا حتي يفكر يشيلها من على السفرة ويسيبك تدبسي فيها.

4- أتجوزي راجل يقدر يفهم ويستوعب إنك إحتمال كبير تتخني بعد الجواز بسببالحمل والولادة والرضاعة فمايعيركيش بإنك تخينه وإنك أتغيرتي ومابقتيش زي زمان، راجل يشوف إنه كمان أتغير وتخن وإن ده شئ طبيعي، مش واحد لما تقوليله ما أنت كمان تخنت وبقيت بكرش وأنا ساكته وماعترضتيش مايخبطش على كرشة ويقولك ده مش كرش ده عز ياهبلة.

5- أتجوزي راجل تقدري تتناقشي معاه مش كل ما تقولي له رأي يسفهه

6- أتجوزي راجل بيقدر طموحك وعايزك تطلعي لقدام مش يشدك لورا

7- أتجوزي راجل وقت ماتحتاجيه تلاقيه مش وقت الجد تلاقيه مع أصحابه مش معاكي أنتِ.

8- أتجوزي راجل خايف عليكي وعلى صحتك وعنده أستعداد يشاركك فى كل حاجة بيت وتربية وشغل، مش واحد رامي كل حاجة عليكي الصبح فى شغله وآخر النهار قاعد على القهوة مع أصحابه.

9- أتجوزي راجل مقتنع إن العيال دول عياله زي ماهمه عيالك يعنى لما عيل منهم يزن بالليل يقوم يشوفه مش أنتِ إللى تقومي كل مرة، يعنى يذاكرلهم ويحمي ويأكل ويشرب مش كله ماما ماما ماما، راجل عارف إن العيال دول جم من ماما وبابا مش من ماما لوحدها.

10- أتجوزي راجل يأخد برأيك مش إللى فاكر إن رأيه دايماً صح

11- أتجوزي راجل يحبك ويراضيكي مش إللى فاكر نفسه لسه عيل وإنك واخده دور الست والدته ولازم تيجي على نفسك علشانه

12- أتجوزي راجل أختارك بعقله وقلبه مش إللى شايف إنه ضحي بنفسه علشان يرضي الست والدته ويسمع كلامها ويتجوز.

13- أتجوزي راجل يصهين ويعدي ومش كل مشكلة يقف عليها، راجل عارف ومقدر تعبك جوه وبره وإن البيوت مابتخلاش من المشاكل.

14- أتجوزي راجل لو زعل منك سهل يتراضي وينسي فى دقائق إللى كان، راجل غاوي العيشة الحلوة مش نكدي وأى زعله بسيطة يحولها لحكاية ورواية وتبقي لبانه فى بوقه يعتتك بيها فى أي زعله تانية بينكم.

15- أتجوزي راجل يحترم غيابك قبل وجودك، مش إللى عامل زي الردار والــX- ray بيبص على تضاريس إللى رايحه وإللى جايه ومش عاملك أى أعتبار من الآخر أتجوزي راجل لإن أشباه الرجال كتروا وإللي يقول غير كده يبقى ضد المنطق.