الفيس بوك يثير حالة مى زكريا منعت من الامتحان بالرغم من حضورها وهى مصابة بالسرطان 

إيمان البدوى 

أثارت الطالبة مى زكريا طالبة بمدينة الثقافة والعلوم قسم اعلام موقع التواصل الاجتماعى فيس بوك وذلك بعد نشر صورها ..

مى مريضة مصابة بالسرطان وتحديدا فى البنكرياس وهى مريضة منذ فترة ممما تسبب فى عدم مقدرتها على اداء الامتحانات النهائية فى الجامعة  وأعدت مى نفسها لدخول امتحان هذا العام حيث اتفقت على الحضور للجامعة على عهدتها وقد فعلت مى ذلك بعد أن تم تركيب جهاز مخصص لمساعدتها على تناول  المحلول والدواء مباشرة على القلب حتى لا يحدث لها  غيبوبة في اللجنة

الا أن الأمر باء بالفشل  بعد ان تم منعها من قبل ادارة الجامعة وقد طلب منها عدة أشياء  وذلك أمس حيث ضاع منها أول مادة ولم تدخلها مما زاد من سوء حالتها بعد تأهلها لحضور أول امتحان ورفض الادارة  لها …..

وقد نشر رواد الفيس بوك وزملاءها بالجامعة نص كلمة مى زكريا كالتالى 

أمس للأسف بعد ما عملت كل الي في جهدي وعملت كل المحاولات الي مفيش انسان يقدر عليها ، دكاترة جامعتي بمنتهى القسوة والظلم شيلوني اول مادة فى الامتحانات متسببين في ” قهري ” بكل ما تحمله الكلمة من ألم نفسي .

قبل ما أخش فى التفاصيل ، الأول لازم احكي انا عانيت ازاي عشان أوصل للامتحان دا وحاربت اد ايه وهما على علم بدأ عشان أخش اللجنه زي اى طالب طبيعي ؛
سألت عميدة معهد إعلام عن ايه الي مفروض يحصل عشان اخد محاليل فى اللجنة لو تعبت وقالتلي أجيب تقرير واسلمه للحكيمة فى الجامعه ، وبناء عليه روحت المستشفى وعملت تقرير بحالتي وبكوني مريضة بسرطان البنكرياس وبحتاج جلوكوز فى الوريد بشكل مستمر وروشتات بكافة ادويتي وعلاجي المتبع .
جيت أسلم الورق لحكيمة الجامعه ، وجاء الرد بكل قلة ذوق كالآتي ” أنا مش هقدر الحقك بمحلول لو اتعرضتي لغيبوبة ، بعدين مريض البنكرياس مفروض يكون راقد وانتي واقفة على رجلك ، معلش يا ماما دي مش مشكلتي ومش مسئوليتي ” ، بعدها طلعت لعميدة المعهد وحكيت كلام الحكيمة لها ، فاخذت مني ورقي الطبي كله وقالتلي متقلقيش انا هتصرف .

وبناء عليه اضطريت أقدم عرض أكبر لاني محتاجة نفسيا جدا أخش الامتحان وانجح فيه ، قلت لعميدة المعهد اني هركب جهاز اخد فيه محاليلي وعلاجي عشان ماخشش فى غيبوبة واسبب إزعاج فى اللجنه للطلاب وعشان ماخسرش امتحاني لأنهم مش هيلحقوني .

للأسف تركيب الجهاز تم لليلة الامتحان بليل ، وبرغم اني سيولتي عالية بسبب علاج الجلطات والي كان مفروض انتظر اكتر والا يحصل نزيف لكن عشان امتحاني خاطرت ، وبدل ما اعمل عملية زي دي فى اوضه عمليات وبتخدير ، اضطريت اعملها الساعه 12 بليل وانا صاحية على سرير أشعة ، اتفتح صدري ودخل جهاز لقلبي و واتخيطت وانا صاحية وبسيولتي العالية ، واتعرضت لالم محدش يتحمله ؛
فضلت صاحية للصبح بعاني من الألم وبذاكر وركبت عربية خاصة ، عشان وانا فى الطريق ألقي صحابي بيتصلوا عليا عشان يبلغوني ارجع البيت ، عميدة المعهد شايفة اني عشان مريضة هزعج نفسية الطلاب فى اللجنة وفى لجنه من الوزارة هتعملهم مشكلة لو شافوني .

صممت اروح ووصلت متأخرة 25 دقيقة ، والي لو كان في ذرة إنسانية كانوا سامحولي أخش امتحاني ، بمنتهى القسوة رفضوا بزعيق فى وشي اني أخش ، بقيت بتحايل عليهم وبعيط لاني أتحملت ألم كبير عشان أوصل الامتحان ومفيش سبب مقنع يمنعني أخش .

انا مرضي مش عاق ليا على اد ما كانت انسانيتهم ، انا مش ” عره ” عشان يخافوا على نفسية الطلاب من مرضي ، انا لو لجنة الوزارة عرفت بس اني حاولت ازاي عشان أخش الامتحان مستحيل كانت ترفض دخولي ، ومفيش اى سبب قانوني يرفض دخولي اللجنة ، عشان عميدة المعهد ترفض دخولي اللجنه من قبل ما اجي اصلا ، وأن كانت اللجنه هتحمل حد مسئولية فدا مش ذنبي ومش مفروض انا الي اتعاقب لاني قدمت كل ورقي قبل الامتحان.

دلؤتي انا ممنوعه من دخول باقي الامتحانات إلا لو جبت تقرير طبي تاني بيقول أن مفيش مني خطر فى اللجنة ، ووالدتي تمضي تعهد ، ومش عارفة التقرير الطبي هيطلع امتى وازاي وامتحاني الجي الأحد !

وناشد رواد الفيس بوك المسؤولين بتقديم حلول تسهل على مى حضور امتحانها حتى لو بعمل لجنة خاصة لها فى مقر المستشفى التى تعالج بها مى أو باستكمال مى لامتحاناتها  ..