كتب – مصطفى النحراوى 

كريم ميكس  منظم الحفلات الأول بالغربية  والذي يبلغ من العمر 26 عام والذي حاز على شهرة كبيرة في مجال تنظيم الحفلات بدء حياته من الدي جي حتى تنظيم الحفلات
كريم ميكس هو ابن مدينة طنطا ويعتبر اصغر منظم حفلات في مصر ومن اشهر المنظمين المعروفين داخل مصر وليس الغربيه فقط
اشتهر كريم ميكس في بداية مشوارة عندما كان يبلغ من العمر 15 عام والذي اثار ضجة كبيرة نظراً لصغر سنه وهو صغير السن ويدير مناسبه بالكامل بمفرده
حتي دخوله مجال تنظيم الحفلات وشهرته الكبيرة من خلال ايفنتات اعمل فرحك في بيتك وهي كانت فكره فريدة من نوعها بل الاولى في مصر فبدلاً من ان يصرف العروس مصاريف كثيرة في حجز قاعات الافراح فيقوم كريم ميكس وفريقه بتحويل المنزل الى قاعة افراح وكل ذلك بمبالغ موفره عن القاعات
وقال كريم ببساطة شديدة أنا حابب المجال ده و بالنسبة لي هو هواية مفضلة جدا ليا و فن بحاول على قد ما اقدر انى اعرف كل حاجة فيه و أطور نفسي دائما …
و مش شرط أنى اكون دى جى فى أى فرح او اى حفلة بنظمها .. عادى جدا اني اكون منظم حفلة او فرح و فيها دي جي تانى زميل ليا .. بالعكس ده شيء بيفرحني جدا.

و أهم أهدافى الفترة القادمة  اللى مخطط لها انى أبدأ فى مجال كورسات تنظيم الحفلات و الافراح و ان شاء الله بدون مقابل مادي تماما .. و لكن دائما بفضل انى اختار التوقيت المناسب لأى خطوة بنفذها.
وشغلى الحمد لله مش مقتصر على طنطا  فقط لا اشتغلت خارج طنطا كتير .. و بحاول على قد ما اقدر انى اعمل اسم خارج محافظة الغربية و لكن بدون استعجال و بخطوات مرتبة .. مش بيفرق معايا الانتشار قد ما بيفرق معايا انى اكون مميز دائما فى اى مكان بسافر ليه.

ولا أفضل وجود بنات داخل فريق عملى وجربت قبل كده فعلا انى اضم بنات لفريق العمل و بصراحة أدائهم يحترم و لكن بفضل وجودهم إداريا اكتر أو وجودهم فى الإيفنتات البسيطة بسبب ضغط العمل او السفر او السهر و دى طبيعة العمل

وبالنسبة لعملى لا يؤثر على علاقتى بأصدقائى الحمد لله علاقتى جيدة جدا بكل زملاء المجال و بحاول بقدر المستطاع ان اقوي علاقتى بيهم .. و بحترم كل زميل ليا فى اى تخصص فى المجال.

قدوتى ومثلى الأعلى فى المجال  وجودي فى المجال و نجاحي فيه فنيا و إداريا ًيتلخص في 3 أشخاص من أقرب الناس لقلبي و عمري ما بنسي ولا هنسى فضلهم عليا.

خالد ديمو ( اللى علمنى الدي جى و حببنى فى المزيكا فى الوقت اللى كان فيه من اقوى و افضل الناس فى المجال ده حرفيا .. و لكن عمره ما بخل عنى بمعلومة )

م/ هانى عبد الجليل ( صاحبى و اكتر من اخ بالنسبة لي , و اللى بفضل الله و بشدة علاقتنا ببعض 90% من المجال عارفين اننا اخوات و هو فعلا اخ كبير ليا .. و سبب وجودى فى اهم ايفنتات حفلات او افراح اشتغلت فيها , ده غير انه حرفيا رقم 1 فى مجال ال LIGHT SYSTEM و من اهم و انجح مستوردين مصر اللى حقق نجاح فى فترة قصيرة جدا , و بعتبره مثل اعلى ليا دائما.

طلعت الكيلانى .. أصغر رجل اعمال فى محافظة الغربية و من وجهة نظري بشوفه اقوي وانجح مدير و صاحب قاعات فى الغربية .. بصرف النظر عن انه ضهر و سند لي فى اى وقت و تحت اى ظرف , انا كل معلومة اتعلمتها فى مجال الادارة عموما كانت بسبب طلعت الكيلاني.

وبالنسبة للشغل فى القاعات او البيوت  مش بفضل شغل القاعات عن البيوت او العكس .. بس دائما بتعامل مع كل اوردر او ايفنت ليا انه مهم و لازم يكون على اكمل وجه و بدون اى اخطاء .
وكنت رافض تماما شغل خطوبات بيت .. و لكن سبب موافقتي عليها و بدايتي فيها الأسعار الخيالية اللى بتحددها الكافيهات , التى تكاد ان تكون اضعاف سعر القاعات .. فا قررت ان اقبل خطوبات البيت و احاول اساعد العروسين على قد ما بقدر انهم يفرحوا ب أقل التكلفة.
اهتمامى بمناسبات الاطفال بخصوص اعياد الميلاد او السبوع او مناسبات الأطفال عموما … عمري ما اشتغلت فيها ولا هشتغل و السبب اني مش عندي الموهبة دى و ببساطة شديدة فى زملاء انجح مني كتير في التخصص ده و فعلا و حرفيا موهوبين و عندهم فن التعامل مع الطفل .. زى زميلى و صديقي الشخصي فارس عبده و زميلتى مروة فايد.
قدوتى ومثلى الاعلى واحد بس لو هختار يكون مين
قدوتى و مثلى الأعلى عبارة عن قائمة او ليست فيها ناس كتير جدا مش حابب انسى حد و لكن بدون شك وليد منصور هو رقم واحد فيهم, بالرغم من بعده حاليا عن الافراح و تركيزه فى الحفلات و انتاج الأفلام و لكن دايما بشوفه انجح منظم حفلات و ايفنتات فى مصر.
و لكن على المستوى العالمي مثلي الأعلى فى تنظيم الأفراح اللبنانى … المبدع  نايمن قزي #neimanazzi … و فى مجال ال DJ العالمي خالد حسين.
ناصحتى لأى حد حابب المجال و نفسه يشتغل فيه .. هو انه يتفرج و يشوف صور و فيديوهات كتير جدا على قد ما يقدر , و يسأل اى حد متميز فى تخصص مهما كان خبرته او عمره … النجاح محتاج معافرة و مرونة.
كما اضاف كريم ازاى بيخطط لليوم مع العروسن عشان يكون يوم ناجح
اكيد لازم بتقابل مع العروسين اكتر من مرة و بنتكلم كتير جدا علشان اقدر افهم تفكيرهم كويس جدا و بنبدأ نخطط لليوم.. دايما بطلب منهم انهم يثقوا فينا و في اننا هنعمل احلى حاجة ليهم اكيد … بسألهم ايه نفسهم يكون موجود فى فرحهم ؟ ايه بيحلموا بيه ؟؟ و بكتب كل حاجة صغيرة او كبيرة فى المقابلة , و بنتقابل مرة تانية بعد اسبوع مثلا او فترة معينة اكون قدرت اكتب كل حاجة اتكلمنا فيها على ورق و قدرت احدد شكل مبدأى للفرح بعرضه عليهم و بنتناقش اكتر من مرة لحد ما نوصل لأفضل شكل او تصميم و نبدأ ننفذه.
اهم مواصفات لمنظم الحفلات و الافراح علشان يقدر يكون ناجح و متميز .. من وجهة نظري انه لازم ” ميحسش نفسه نجم ” دايما يكون رجله على الأرض و فكره هو اللى فوق فى السما علشان يقدر يحس بالناس و يوصل لهم بسرعة … كمان لازم يكون ” قنوع جدا و عنده شبع ” ماديا و معنويا و يتعامل مع العريس بصفة خاصة انه اخ له و يقدر ان الفرح يوم فى العمر .. و يفكر فى العريس معنويا اكتر ما يفكر في نفسه مادياً.
وبالنسبة للعروض الجديده اللى هقدمها في سنة 2019
دائما بحاول اعمل عروض و خصومات طول السنة على قد ما بقدر .. بهتم اكتر و بيفرق جدا معايا فرحة العريس او العروسة اكتر من الماديات.
وبالنسبه لمهندس الديكور اللي بينفذ اعمالى 90% الديكورات اللى بشتغل بيها تصميم و تنفيذ والدى المهندس عبدالله مغاوري . حرفيا له دور كبير جدا فى وجودي فى المجال ده سواء ماديا او معنويا او فنيا .. دوري بينتهي فى اختيار شكل الديكور , و هو بيصمم الديكور و بينفذه و بيتابعه فى الورش و المصانع.
أحب أوجه كلمه لفريق عملى
طبعا بدون فريق العمل اللى معايا عمري ما كنت هوصل لأى نجاح او أتقدم  خطوة واحدة .. بحمد ربنا على وجودهم دائما سند لي و معايا فى اى ايفنت و بوجودهم بقدر انى انفذ اكتر من حفلة او فرح في اليوم
وفي النهايه لازم اشكر صاحبة الفضل عليا اللى دائمأ احتزي برأيها وبهتم به هي أمي اللى مهما اتكلمت عنها مش هقدر اوفيها حقها هي نعم الام والاخت والصديقه وطبعا اخويا المهندس الصغير اللى بتشرف به وبتمني يكون احسن وافضل مني وانا بعتبره ابني مش اخويا وبس وطبعا عائلتي بالكامل هم من اصحاب الفضل عليا بعد ربنا عز وجل…