بقلم الإعلامي : محمد العزبي
هحاول أكتب بلغه دارجة عشان اقدر اوصل رسالتي للكل … و عشان احنا كمان صايميين فلازم نخرف .
الواحد بيصحى من النوم يخلص اي حاجة هيعملها و يرجع يضيع وقته في الفيس و تويتر كالعاده .. الجديد بقا ان الناس انهارده لما بتلاقيك بتهاجم الحكومه او وزير معين و بتنشر فساد لاحظت ان فيه ناس رافضه حتى المصارحه او مجرد الحديثعن ان فيه فساد .. و فجأه حولوك لنكسجي او اخوانجي لان عايز توقف المسيرة …
الناس مش قادرة تفرق بين الجيش و الرئاسه اللي هما في كفه و الحكومه اللي في كفة تانيه …. الكفه الاولانيه دي ماشيه بسرعه الضوء و الكفه التانيه بقت مجرد حجر مربوط في الكفة الاولانيه و بيحاول يغرقها … لما نتكلم نبقى خونه …
هنفتكر مع بعض المشهد العبقري اللي كتبه صالح مرسي في مسلسل رافت الهجان
لما رأفت طلب من المخابرات المصريه انه يجند “سيرينا أهاروني” لانها دايما بتهاجم الحكومه و مش عاجبها اللي بيحصل … فرد عليه العبقري محسن ممتازو قاله اللي زي دي متحاوش تقرب منها لان نقدها للحكومه جاي من رغبه جواها في الوصول باسرائيل لأكمل صوره و دي مستحيل تتجند …
مقالوش عليها خاينه يعني …
اللي بيحب البلد بجد لازم يقف جنبها ..مش مجرد شعارات و خلاص .. لازم زي ما فيه جنود بتحارب عشان البلد عالحدود و بيستشهد منهم كل يوم شهداء .. لازم انت كمان تحارب عشان بلدك … ارفض الفساد … افضحه … بلغ عنه و تابع بلاغك …اوعى تخاف من حد … الحامي هو الله … و الريس اطلق يد الاجهزة الرقابيه في محاربه الفساد … يبقى لازن نكون سند للدوله ونبلغ عن الفساد مش نتفرج او يتقال علينا بقينا اخوانجيه عشان بنتصيد الاخطاء للحكومه .. ” مع العلم اني مش شايف عندها أيوتها حكومه نهائي … يمكن هما 4 او 5 وزراء بالكتير و الباقي ولا ليه اي لازمه
عموما انا مطبلاتي لجيشي .. وهدعم جيشي بكل قوتي … لكن الحكومه لو وصلني اي فساد هفضحه و مش هسكت .. و ياريت كفايه تخوين في اي حد عايز يقف جنب البلد بجد
رمضان كريم