بقلم الدكتور / وليد قاسم

ما الحل فى مجتمع تعود على الكسل والتراخى فى كل شيء …مجتمع مش عايز ولا بيحب يشتغل….وكل الى عايزه أنه يأكل ويشرب ويركب عربيه ويتفسح ويبقى مدير وينام.

١. النهارده الفلاح بيبيع أرضه علشان مش يشتغل ولا يتعب ويروح يشترى تاكسى ويركب ويبسط نفسه.

٢. الموظف بيروح ينام ف الشغل وياكل فول وطعميه ويعطل مصالح الناس ويروح الساعه ٣ ينام ويسهر على القهوه او يخلى زميله يمضى مكانه او ..او …ويشتكى من الأسعار.

٣. الشباب.. منهم الى قاعدين على القهاوى اوبيتفرجو على الفيس بوك أو الكوره او راكبين توكتوك او ماشيين يبلطجو على الشعب او بيسرقو…او ..او…ويقولك مش لاقى شغل …مع ان الشغل كتير بس ازاى يتعب ويعرق ….دون تحمل اى مسؤليه.

٤. الوظائف الخاصه في المجتمع تذبح الشعب…فتلاقى الطبيب والصيدلى والمهندس والمحام والتاجر بيمصو دم الشعب بلا رحمه ولا شفقه ويقولك يعنى اصرف منين.

٥. ليه نتهرب من الضرائب وليه نستغل الاملاك العامه كخاصه وليه نفرط فى إستخدام الكهربا والماء ونضرب عدادات او اصلا ميكنش فيه عدادات.

٦. شعب ماشى ببركه ربنا ولا عنده احترام للديموقراطيه ولا يعرف يعنى ايه إحترام الآخر.

٧. لما بنسافر بره بناكل ونفحت ف الصخر ومهما نتهزا مش بنتكلم ، علشان ده شغل خاص وهنجيب منه فلوس … ما تشتغل هنا وانحت ف الصخر وبردو هتلاقى نفس الفلوس ومحدش هيجرحك.

٨. أعضاء مجلس الشعب والقيادين والتنفيذيين ، مشغولين فى نفسهم ولا عزاء للضعفاء والمواطنين..

وأنا على يقين تام أن رفع الدعم كليا ليس موجع لكل فئات الشعب ،بل سيتذوق مرارته البسطاء .

ولكن هو دواء مر لابد منه، وأخيراً لا ابرر مطلقا ولا اؤيد قرار بعينه ولكن فلنغير أنفسنا أولا ومن ثم نطلب بحقوقنا ..

مش كل حاجه هنقول الحكومه وتبقى هيا شماعه الفشل الى احنا عايشين فيه… استقيمو يرحمكم الله.