جمال عبد الناصر يكتب: إحنا الشعب

أيوه إحنا الشعب .. اللي مالوش لاماسكة .. ولا مالكة .. ولا لينا خطة ولا طريق ولا سكة .. بس إحنا اللي سايبنها على ربنا وأهي ماشية وسالكة ..
إحنا الشعب اللي مالوش كتالوج ..يعني إحنا الشعب اللي فعلا متدين بطبعه .. بس عندنا مشكلة كبيرة جدا في نسبة التحرش .. وإحنا برده الشعب اللي حكمتنا واحدة ست من 7000 سنة ..وإحنا برده اللي اخترعنا المثل * الست ملهاش الا بيتها وعيالها * ..
إحنا الشعب اللي محدش يتوقعه .. في عز مالعالم فاكر انه مبسوط .. بيطلع ويثور ويكسر القيود .. وفي عز الدنيا متكون ضلام ومحتل ومخنوق .. بتلاقيه شادد حيله على الحدود ..الشعب اللي خلا الهلفوت زعيم علشان فيلمين سيما .و رخص الغالي وغلا الرخيص وعمله قيمة ..
إحنا الشعب اللي كرامته في حضارته .. ورغم كده سيبناهم يكسروا مناخير ابو الهول .
.إحنا الشعب اللي تلاقينا نبكي واحنا بنسمع السلام الجمهوري .. وإحنا برده اللي زعلانين طول الوقت من البلد واللي فيها ..
إحنا الشعب اللي بيتباهى انه دهن الهوا دوكو .. وإحنا برده اللي مش عارفين هو زويل إخترع الذرة ولا فك رموز حجر شكوكو.
.إحنا الشعب اللي بيحسدونا على ضحكتنا .. ونص العالم بيقول علينا ولاد نكتة ياكبير .. وإحنا برده اللي في عز فرحتنا نبكي كتير .. وفي عز ضحكتنا نقول اللهم إجعله خير ..
إحنا الشعب اللي ماتش كورة ممكن يخللي الشوارع صحرا .. وبرده إحنا اللي ممكن طبق بوظة ينسينا همومنا .. وينسينا اصلا إن فيه بكره ..
وإحنا الشعب اللي من 70 سنة لم الشمل في جامعة الدول ..وإحنا برده الشعب اللي خلا نفس الجامعة سكة شمال ….
وإحنا اللي النيل تلاقيه باصص على ابو العلا .. وطالل على الزمالك .. ونص الشعب غلبان بس سايب الملك للمالك ..
إحنا الشعب اللي ميعرفش يقول معرفش .. ولو مشي ميقفش .. ولو وقف ميمشيش .. وإحنا اللي في عز أزماتنا بنضحك .. ونقول هم يضحك .. وهم مايتنسيش ..
إحنا الشعب اللي الغني نايم في فيلته بيوحوح .. والغلبان بشوية مش بيمخمخ ..
إحنا الشعب اللي عايش علشان يهرب من حدودها … وإحنا برده الشعب اللي دموع الغربة بتخلينا نشتاق لوجودها ..
إحنا الشعب اللي بيحلف بالعيش والملح والمكتوب على الجبين .. وبرده إحنا الشعب اللي ال 100 مليون متخاصمين ..
إحنا الشعب اللي متأكد اننا منسواش حاجة من غيرها ..وإن لحم أكتاف جدودنا من خيرها ..لكن إحنا برده اللي مصممين نكسر خاطرها .. ونهين كبيرها ..
إحنا زي ما إحنا .. من يوم ماربنا خلق البشرية وخلقنا .. بس اللي خلانا إحنا مش زي غيرنا .. هو إننا مصريين ..

#إحنا_الشعب2
إحنا الشعب العاشق للتناقضات .. الشعب اللي كل حاجة وعكسها .. بالنهار حاجة وبالليل ضدها ..
إحنا الشعب اللي شعاره في الحياة يا أبيض يا أسود .. لكن في الحقيقة عايشين الحياة يا أبيض يا أحمر ..
إحنا الشعب اللي فرحته بالدوري .. أكبر من فرحته بتحرير سينا ..
وإحنا الشعب اللي بنى الأزهر وبيكنس السيده على العدوين.. وإحنا برده اللي عيشنا مفيهوش ملح للخونة والمجرمين ..
وإحنا الشعب اللي جدوده شيدوا الهرم علشان يفضل عبرة وذكرى للتاريخ .. وإحنا الأحفاد اللي خلينا الهرم شارع من كوكب المريخ ..
وإحنا اللي أما اتنحنحنا رقصنا الديناصور .. وإحنا اللي الصغير فينا ضحك علينا وركبنا الحنطور ..
وإحنا الشعب اللي عايش ومش عايش .. ورغم الغلب ب 100 الف يشتري غوايش ..
وإحنا الشعب اللي بيصرف فلوسه في مارينا في عز الحر .. وإحنا اللي الغلابة بتعمل برونزاج في راس البر ..
إحنا التركيبة اللي ملهاش مقادير .. وإحنا اللي حضرنا العفاريت وسيبناها تطير ..وإحنا اللي قولنا على بيت الزوجية .. عش العصافير .. وساعة الجد ياشقة ملك يا إما تقولك .. إنت طير ..
إحنا الشعب اللي الزبيبة منوره جبينه .. وإحنا برده الشعب اللي مفيش حاجة ماليه عينه ..
وإحنا الشعب اللي قولنا على الاقرع .. إنه شعره كنيش .. وإن من غيره الشعب مش هيعرف يعيش ..بس برده إحنا اللي جمعتنا متكملش من غير الشعراوي .. ويادوب يقول السلام عليكم تلاقي نص الشعب على القهاوي ..
إحنا الشعب اللي حيطانه ليها ودان .. ونهاره له عينين .. ولولالكي كانت ثورة الملايين ..
إحنا بقى اللي وقت اللقا بنبكي .. وساعةالجد بنشكي ..وتذكرة غربتنا .. رايح جاي !!

#إحنا_الشعب2
إحنا الشعب العاشق للتناقضات .. الشعب اللي كل حاجة وعكسها .. بالنهار حاجة وبالليل ضدها ..
إحنا الشعب اللي شعاره في الحياة يا أبيض يا أسود .. لكن في الحقيقة عايشين الحياة يا أبيض يا أحمر ..
إحنا الشعب اللي فرحته بالدوري .. أكبر من فرحته بتحرير سينا ..
وإحنا الشعب اللي بنى الأزهر وبيكنس السيده على العدوين.. وإحنا برده اللي عيشنا مفيهوش ملح للخونة والمجرمين ..
وإحنا الشعب اللي جدوده شيدوا الهرم علشان يفضل عبرة وذكرى للتاريخ .. وإحنا الأحفاد اللي خلينا الهرم شارع من كوكب المريخ ..
وإحنا اللي أما اتنحنحنا رقصنا الديناصور .. وإحنا اللي الصغير فينا ضحك علينا وركبنا الحنطور ..
وإحنا الشعب اللي عايش ومش عايش .. ورغم الغلب ب 100 الف يشتري غوايش ..
وإحنا الشعب اللي بيصرف فلوسه في مارينا في عز الحر .. وإحنا اللي الغلابة بتعمل برونزاج في راس البر ..
إحنا التركيبة اللي ملهاش مقادير .. وإحنا اللي حضرنا العفاريت وسيبناها تطير ..وإحنا اللي قولنا على بيت الزوجية .. عش العصافير .. وساعة الجد ياشقة ملك يا إما تقولك .. إنت طير ..
إحنا الشعب اللي الزبيبة منوره جبينه .. وإحنا برده الشعب اللي مفيش حاجة ماليه عينه ..
وإحنا الشعب اللي قولنا على الاقرع .. إنه شعره كنيش .. وإن من غيره الشعب مش هيعرف يعيش ..بس برده إحنا اللي جمعتنا متكملش من غير الشعراوي .. ويادوب يقول السلام عليكم تلاقي نص الشعب على القهاوي ..
إحنا الشعب اللي حيطانه ليها ودان .. ونهاره له عينين .. ولولالكي كانت ثورة الملايين ..
إحنا بقى اللي وقت اللقا بنبكي .. وساعةالجد بنشكي ..وتذكرة غربتنا .. رايح جاي !!

إحنا الشعب 3
إحنا الشعب اللي هوايته يناقض نفسه .. العيب عنده بقى حرام .. والحرام بقى يادوب عيب .. بس ساعة الآدان تلاقي دقون بتجري ومقصرة الجلاليب ..
إحنا الشعب اللي بيموت في المظاهر .. وقاتلاه المشاعر .. شعاره انه بيشتري راجل .. وساعة القايمة ممكن يكتب فيها ب 100 الف حمام زاجل ..
وإحنا اللي بنتباهى بزحمتنا .. وصفارة زمان جمعتنا .. وبرده عصاية فركشتنا .. بس لسه بنتباهى بروح الفانلة اللي فضحتنا ..وإحنا اللي قالولنا اننا جامدين اوي .. وشعب فاهم وفهلوي ..
وإحنا الشعب اللي عنده بطل قومي إسمه صلاح .. وبرده عنده مجدي مقشه ..مركب دقن سفاح ..
وإحنا الشعب اللي كوكبه إنت عمري .. وعندليبه في دمه بيجري .. بس برده صوت عبدالباسط بيخليه يبكي ..
إحنا الملايين اللي هتفنا لناصر .. وعشنا طول تاريخنا نعافر .. إحتلال وظلم وقهر وكسر خاطر ..
وإحنا الشعب اللي جدوده بنوا حضارة .. وإحنا ال 100 مليون اللي عايشين في حضانة ..
وإحنا اللي كل يوم نندب حظنا على مصريتنا .. ونتمنى نركب الطيارة ونغير جنسيتنا .. وإحنا برده اللي غربتنا مرة .. ومحدش بيحس بالفراق والحسرة .. الا اللي عاش وجرب الوداع ولو مرة ..
وإحنا الشعب اللي هيشنا الهوامش ..وركبنا القرد المراجيح .. وغنينا للقفا .. بعد ماكنا بنقلد الفلاح الفصيح ..
إحنا غلابة .. او والله العظيم غلابة .. كلمة تفرحنا .. ودمعة تبكينا .. وكل الحكاية .. إننا نفسنا نعرف فين البداية ..
إحنا الشعب خلينا الجعجاع رمز لمحاربة الفساد .. وسيبناه طايح في البلاد واعراض العباد ..وإحنا اللي عنده شاب فلاح أبهر الكون بأخلاقه .. وآخرتها مجدي مقشة ماسك في خناقو ..ياشعب .. يابلد .. ياناس ياهوووووو .. القط مش بيخاف الا من خناقه …
إحنا الشعب .. اللي نفسه فعلا يبقى شعب ..بس تعب من كتر الغلب ..
إحنا الشعب اللي بقالو 7000 سنة مش لاقي عنق الزجاجة ..