“ميران حسين”.. تكتب: 《ضد المنطق》.. أوعي تتجوز

أنصافاً للحق لازم نقول إن فيه أنواع من الحريم للأسف يتفات لهم بلاد، أنواع تقدر توصل أى بني آدم خلقه ربنا إنه يقوم يقتلها بدون وعي أو تفكير، لدرجة إنه مش هايحس بأى تقنيب ضمير وقت ما يتقبض عليه لإنه هيكون شايف إنه عمل خير للبشرية كلها لإنه خلصهم منها.

علشان كده لو بتفكر تتجوز “والعياذ بالله ” فكر كويس قوي قبل ما تأخد الخطوة دي لإنه قرار مصيري ومش سهل زي ما أنت فاكر .. فلو عزمت وقررت الجواز فأستعن بالله علي المصيبة السودة إللى بدعيلك ربنا يعينك عليها طبعاً.

المهم لما تختار لازم تبعد عن الأنواع دي بدل ماتلاقي نفسك نزيل فى الخنكه أو آراميدان .. علشان كده بقولك أوعي تتجوز:

1- إللي بتقويك علي أمك وبتعصيك عليها وعمرها ما بتقولك كلمها أو
روحلها أو لازم تشيل وتجيب لها وأنت داخل عندها.

2- إللي بتقيمك علي أخواتك وتشيلك منهم، ونسيت إن بينك وبينهم صلة دم
عمرها ماتتقطع إبداً، إنما إللى بينك وبينها مجرد كلمها وورقة سهل فى
أى لحظة تنتهي.

3- إللي بتحكي كل حاجة لأمها وأخواتها وصاحباتها وفاتحه ودانها لغيرها
فبتقلب البيت حريقة ومش قادرة تستوعب إن أسرار البيوت للي
عايشين فيها.

4- إللى مابتقدرش ظروف جوزها وهاتك طلبات طلبات طلبات، وقاعدة
فى البيت وتبعت البواب يجيبلها كل حاجة بالغالي أو تتصل بالسوبر
ماركت إللى مسعر أى حاجة بثلاث أضعاف سعرها.

5- إللى كل حياتها الطبيخ والبيت والعيال، وتقعدلك مبهدله ومنكوشه
وريحة الطبيخ طالعاك من كل مكان، ووقت ماتغلط وتكلمها يكون ردها
الله تعبانه طول اليوم فى البيت ومع العيال، ولما تخرج تلاقيها قمر
14، فتكتشف إنك كزوج مالكش أى مكان، المهم المكانة الأجتماعية
بره قدام الناس.

6- إللي لو قربت تبوسها تقولك أحنا كبرنا علي الكلام ده والعيال بقت
طولك، ولما تبص لنفسك فى المرايا تكتشف إنك لسه مكمل “41” من
شهرين والعيال إللى بقت طولك أكبر مسخوط فيهم بسم الله ماشاء الله
عنده “13” سنه وأصغرهم عنده “7” سنين.

7- إللي عايزاك تقطع علاقتك بكل أصحاب الدراسة من البنات وكأنهم
هيخطفوك منها، ومش قادرة تفهم إنك لو كنت عايز واحدة منهم كنت
أتجوزتها من زمان إنما أنت بتعتبرهم أخواتك البنات مش أكتر.

8- إللي بتغير بجنون عليك لأنها هتعكنن عليك وهاتحول حياتك لجحيم،
بتتبص دي ليه، بتكلم دي ليه، ومش عايزة تستوعب إن شغلك بيفرض
عليك تتعامل مع الحريم.

9- إللي عايزاك طول اليوم قاعد جنبها ومالكش أي وقت خاص بيك،
فممنوع عليك تخرج مع أصحابك، أنت أتجوزتها يعني مربوط معاها
بسلسسة.

10- إللى بتفتش فى حاجتك وعاملة فيها كوچاك وتحسسك إنك عايش فى
محطة مصر، وبتقلب في موبايلك من وراك فى الرايحة والجاية.

12- إللى مابتهتمش تعرف إيه إللى يريح جوزها أو يسعده وكأنه مالوش
مكان فى البيت ومجرد ATM وبس.

13- إللى مابتهتمش لا بالبيت ولا بالعيال وكل أهتمامتها الخروج
والأصحاب والكوافير واللبس والميك أب وبس .

14- النكدية إللى يستحيل العيشة معاها، الواحد بيتجوز علشان يعيش مش
علشان يقرف نفسه يابني.

15- الزنانه وكتيره الكلام إللي مش بتراعي إن جوزها راجع من الشغل
تعبان ومحتاج يرتاح.

16- إللى ماعندهاش عقل وماتعرفش عن الثقافة شئ ولو نقشتها تحس إنك
بتنناقش كنبه ولا سرير.

17- إللي بتقارن دايماً حياتها بحياة غيرها ومش بترضى بحالها وإللى ربنا
قسمه لها.

18- قليلة الأدب، سليطة اللسان إللي ماتعلمتش الأصول والأدب في بيتهم.

19- المتسلطة والمغررورة وإللى صوتها عالي على الفاضي والمليان.

20- الشكاكة والشكاية والطماعة والعندية لدرجة الكفر.

21- الكذابة وإللى بتنقل الكلام من هنا لهنا.

دي كلها أنواع عايزة الحرق مش الجواز، ولكن زي ما بيقولوا كل فوله وليها كيال، وزي مافيه ناس بتكره الأنواع دي هتلاقي ناس تانيه بتدور عليهم بمنكاش وإللي يقول عكس كده يبقي ضد المنطق