كتبت  /  نجيبه المحجوب

ما حدث بمدينة الاسكندريه ادمي قلوبنا جميعا رحم الله الضحايا اما المهملين فلا تأخذنا بهم رحمة. لكن ان يصل الحال من شبابنا او بعضهم التريقة علي بطل من ابطال الشرطه المصرية لزيادة وزنة علي شبكات التواصل الاجتماعي الفيس بوك فهذا عار علينا جميعا وبالفعل نحتاج ثورة اخلاقية وسلوكيه ووجدت ان بوست النقيب حسام صلاح من قوة شرطة الاسكندرية علي صفحته معبر جدا عن رفضه ورفض كل الشرفاء لما  فعله شباب الفيس من تريقه   وسخرية ولذا انشر بوست النقيب حسام من صفحته الخاصه لما لمسته فيه من احترام وتقدير لمهنته وزملائه وفد ذكر  هل وصل بينا الحال للسخريه والتريقه على ناس بتموت عشانك ؟…وصلت بينا التفاهه  اننا نسخر ونهرج من انسان عشان شكله مش عاجبك ياللي نايم على بطنك وقاعد عالفيس بوك وبتتريق …. يا طعم يانايتي منك ليه ياللي كل انجازاتك في الحياه بوست عالفيسبوك…مصطفى بيه اللي انت بتتريق عليه كان بطل الجمهوريه في التايكوندو واتصاب في فقرات ضهره وقعد فتره كبيره يتعالج وميتحركش ووزنه زاد نتيجه لده…ولما وقف على رجليه كمل شغله ومقعدش على مكتب ونزل الشارع ومن ايام المحافظ المحجوب وهو في المرور ومن اقدم ضباط مرور اسكندريه واكثرهم احتراما للناس وروحه حلوه وتقدر تسال السواقين والناس عليه….ونزل في عز المطر والسيول اللي حصلت يقوم بواجبه عشان ييجي واحد تافه زيك يتتريق عليه….

ماهو انت لو كنت بتشتغل 14 ساعه كل يوم متواصل وقاعد خدمه على كنيسه او جامع او منشأه هامه او.تمركز ثابت وبعد ماتخلص تروح البيت تاكل وتنام من كتر التعب عشان تلحق تنزل الصبح الشغل ومفيش فرصه حتى تشوف عيالك مش تروح جيم او تلعب رياضه كنت فهمت اد ايه الواحد عمره ما بيحب يهمل في نفسه..لكن شغلته وواجبه اهم خصوصا في ظروف البلد دي…عمرك ماجربت تقعد في فريق بحث لجريمة قتل بال3 اسابيع مبتدوقش النوم الا على كرسي المكتب…ولا عمرك هتحس بالظابط اللي طالع يأمن انتخابات في محافظه بعيده ويروح ينام في مدرسه او مستوصف عشان سيادتك تنتخب….وحتى لو كان ده واجب واحنا عارفين ..عليك انك تعرف الظروف دي عشان متتريقش وتكتب بوستات تريقه فيها محن وقلة ادب…

اخس عالظروف … واخس عالاخلاق اللي اتدفنت…خليك انبهر بوقفة رمضان صبحي وشلوط حازم امام واغنية مفيش صاحب يتصاحب….واتريق على اللي بيموت عشان انت تعيش واسخر منه براحتك…ماهي المعايير والموازين كلها اتقلبت…

احنا اسفين يا مصطفى بيه وحقك علينا انت وكل فرد وكل عسكري قام بواجبه…واذا اقدم اعتذار كل وطني وشريف لكل حماة الوطن ونتمني من وراء التواصل الاجتماعي ان نكون اكثر وطنيه اكثر ايجابية ونقدم النموذج الذي يليق بشباب مصر ونتعاون جميعا من اجل رقي مصر رتقدمها