كتبت خبيرة التجميل:نوران العربى 

كريم الأساس تقريبا من أصعب الخطوات  في المكياج التى  يعانى البعض من البنات من  صعوبة تظبيطه  بشكل جيد  وبالتالي  كريم الأساس يكون سىء لأنة يعتبر مكياج الأساس كله لو اتظبط هيظبطلك كل المكياج, وما هى  أكثر الأسباب إللى بتخلي كريم الأساس يطلع شكله مش حلو على البشرة.

تعالوا نعرف مع بعض ليه كريم الأساس بيبوظ:

1- مش بتقشري بشرتك بشكل كافي:

واحدة من الأسباب إللي ممكن تأثر على شكل كريم الأساس اننا مش بنهتم ببشرتنا بشكل كافي, البشرة بتبقى محتاجة تقشير بانتظام عشان نزيل كل الجلد الميت وننضف المسام ونخليها ناعمة وشكلها مخملي, اعملي تقشير خفيف للبشرة من مرة لمرتين في الاسبوع.

2- بتستخدمي لون غلط:

اختيار درجة لون غلط من كريم الاساس واحد من الاسباب اللي بيخلي شكله يطلع مش حلو على البشرة, عشان كده مهم جدا اننا نختار درجة اللون بعناية لازم تكون نفس درجة لون بشرتك بالظبط, يعني ميكونش افتح ويبقى باين اوي على البشرة ولا اغمق ويغمق بشرتك احسن درجة انه يكون مطابق للون البشرة بالظبط وزي ما قولنا قبل كده جربي اللون على الرقبة او خط الفك عشان تجيبي اللون الصح.

3- مش بتستخدمي برايمر:

البرايمر من الخطوات المهمة جدا اللي بتحافظ على كريم الاساس وبتثبته لفترة طويلة, وتطبيق البرايمر على البشرة قبل كريم الاساس مش بس بيساعد على ثباته لكن كمان بيطفي لمعة الوش, بيقلل حجم المسام الواسعة, بيخفي احمرار والتهاب البشرة.

4- بتستخدمي كريم اساس مش مناسب لنوع بشرتك:

كل نوع بشرة بيبقى ليه متطلبات مختلفة يعني البشرة الجافة غير الدهنية غير العادية, عشان كده لازم تكوني عارفة نوع بشرتك كويس جدا عشان تقدري تشتري كريم الاساس المناسب لنوع بشرتك ويطلع شكله حلو ومثالي على البشرة.

5- مش بتستخدمي بودرة:

اللوس بودر تعتبر المفتاح السحري لثبات كريم الاساس اطول فترة ممكنة خصوصا لصاحبات البشرة الدهنية اللي بيعانوا دايما من الدهون الزيادة في البشرة ولمعانها, عشان كده خطوة البودرة مهمة بعد ما تطبقي كريم الاساس حطي طبقة خفيفة من البودرة, والبودرة مش بس بتثبت كريم الاساس كمان بتسهل تطبيق البلاشر والكونتور او البرونزر.
6- مش بتستخدمي الاداة الصح لتطبيق كريم الاساس:

اداة وضع كريم الاساس من الحاجات المهمة جدا اللي ممكن تأثر على شكله على البشرة, والاداة بتختلف من نوع كريم اساس للتاني يعني في انواع ممكن نستخدم فيها صوابعنا وانواع تانية بيبقى انسب لها استخدام فرشة كريم الاساس او السبونج, ولو مش عارفة تحددي تستخدمي اي اداة مع نوع كريم الاساس بتاعك ممكن تجربي كل الطرق وتشوفي اي واحدة منهم هتخلي كريم الاساس احلى على بشرتك.