✍️ مصطفى النحراوى

كريم مكس  منظم الحفلات الأول بمحافظة الغربية والذي يبلغ من العمر 27 عام والذي حاز على شهرة كبيرة بمجال تنظيم الحفلات بدء حياته من الدي جي حتى تنظيم الحفلات ووصل إلى مدير اعمال فنانين بمصر.
كريم من مدينة طنطا بمحافظة الغربية ويعتبر اصغر منظم حفلات في مصر ومن اشهر المنظمين المعروفين داخل مصر وليس الغربيه فقط
اشتهر  في بداية مشوارة عندما كان يبلغ من العمر 15 عام والذي اثار ضجة كبيرة نظراً لصغر سنه وهو صغير السن ويدير مناسبه بالكامل بمفرده
حتي دخوله مجال تنظيم الحفلات وشهرته الكبيرة من خلال ايفنتات اعمل فرحك في بيتك وهي كانت فكره فريدة من نوعها بل الاولى في مصر فبدلاً من ان يدفع العروس مصاريف كثيرة في حجز قاعات الافراح فيقوم  ميكس وفريقه بتحويل المنزل الى قاعة افراح وكل ذلك بمبالغ موفره عن القاعات
وقال كريم ببساطة شديدة أنا حابب المجال ده و بالنسبة لي هو هواية مفضلة جدا ليا و فن بحاول على قد ما اقدر انى اعرف كل حاجة فيه و أطور نفسي دائما.

وأضاف “مكس” عن فكرة الفرح الصغير او الغاء الفرح بهدف السفر   انه ضد فكرة ان البنت متعملش فرح لأن ببساطة الفرح يوم واحد فى العمر أما السفر هيجى تانى وممكن جدا تعمل فرح صغير او كتب كتاب سواء فى مسجد او فى مكان بسيط.

وأشار إلى الفرق بين الافراح زمان و الافراح حاليا و خصوصا افراح الفنادق الفايف ستارز
وقال مكس لما بتحجز فى اوتيل فايف  ستارز بتاخد القاعة فاضية و كل الموضوع ان الأوتيل بيرشحلك اكتر من اسم ويدنج بلانر فقط و اقصي حاجة ممكن تستفيد بيها من الأوتيل هي الطرابيزات او الكراسي العاديين جدا و طبعا الأكل و كل الباقي تخصص و مسئولية الويدنج بلانر.

لافتا إلى أن الأفراح التي تكون بميزانية بسيطة بيتم التعامل  معاهم فى خلال البادجت المحددة و بنعمل كوشة و مدخل حلو جدا يتناسب مع ذوق المكان و البادجت المحددة ليا و لو الفرح فى أوتيل بستفيد من طرابيزات و كراسي المكان و لكن بنجهز  ديكور خاص بينا مثلا زي اضافة كفر اللون الاسمر و الجولد اللي دائماً بيظهر بشكل حلو جدا.

وأضاف خلال وجوده فى فرح بسيط عشان احوله لفرح مهم جدا  بتدخل بداية من الميكب و الكوافير و التصوير و الديكوريشن بالكامل و اختيار المطربين و الفانين  و اكيد بنتناقش مع العروسة و العريس في كل تفاصيل فى الفرح علشان نقدر نعمل يوم محترم و كويس جدا.

وكشف مكس عن الكوشه الخاصة بأيام زمان انها موضة و لكن احنا مش بنعمل كوشات زى زمان زي من 10 – 15 سنة مثلا حاليا اللى طالع موضة هو الكوشة الـ سكرين و دى عبارة عن شاشة بتعرض مؤثرات و فيديوهات 3D.

وفى نفس السياق تحدث مكس عن الدي جي الموهوب حاليا فى مصر من وجهة نظره وقال مش عاوز انسي حد و لكن ببساطة شديدة برتاح نفسيا فى وجود خالد ممدوح او مجدي مدحت فى أي فرح او ايفنت انا مسئول عنه حقيقي من اكتر الناس الموهوبة فى مصر.

وفى السياق ذاته قال عن إلغاء الزفه الدمياطي  ان الزفه الدمياطى من أهم الأساسيات فى اي فرح و حرفيا فقرة 15 دقيقة من اجمل فقرات الفرح  إلا لو العروسين ليهم فكر معين فى ستايل و شكل فرحهم و بيقرروا يستغنوا عنها بوجود بديل تاني زى عازف ساكس مثلا.
ووجه نصيحه لاي  حد حابب المجال و نفسه يشتغل فيه وقال  اللى حابب المجال ونفسه يشتغل فيه يتفرج و يشوف صور و فيديوهات كتير جدا على قد ما يقدر  و يسأل اى حد متميز فى تخصص مهما كان خبرته او عمره  النجاح محتاج معافرة و مرونة.
وأكد أنه قبل اي فرح  لازم يتقابل مع العروسين اكتر من مرة و بنتكلم كتير جدا علشان اقدر افهم تفكيرهم كويس جدا و بنبدأ نخطط لليوم.. دايما بطلب منهم انهم يثقوا فينا و في اننا هنعمل احلى حاجة ليهم اكيد .. بنتناقش اكتر من مرة لحد ما نوصل لأفضل شكل او تصميم و نبدأ ننفذه.

 وأشار إلى اهم مواصفات الويدنج بلانر الناجح  ان منظم الحفلات و الافراح علشان يقدر يكون ناجح و متميز .. من وجهة نظري انه لازم ” ميحسش نفسه نجم ” دايما يكون رجله على الأرض و فكره هو اللى فوق فى السما علشان يقدر يحس بالناس و يوصل لهم بسرعة  كمان لازم يكون ” قنوع جدا و عنده شبع ” ماديا و معنويا و يتعامل مع العريس بصفة خاصة انه اخ له و يقدر ان الفرح يوم فى العمر .. و يفكر فى العريس معنويا اكتر ما يفكر في نفسه مادياً.

وتابع حديثه عن مواصفات وكيل إدارة اعمال الفنانين الناجح دايما بشوف ان قبل الجدية فى التعامل و الالتزام بالمواعيد .. لازم اكون واثق في موهبة الفنان المسئول عن شغله و نجاحه و الحمد لله اني موجود فى إدارة اعمال اكتر من فنان محترم له اسم قوي و نجاح ملحوظ فى الفترة السابقة زي الفنان خالد السايس و الفنان محمد شاهين.

وأشار مكس فى نهاية حديثه عن قدرته فى مجال عمله بتنسيق الافراح و الديكور و بين ادارة اعمال المطربين اوالفنانين  وقال انه طبعا بدون فريق العمل اللى معايا عمري ما كنت هقدر اعمل ده ولا هقدر اركز فى اكتر من تخصص فى وقت واحد ولا هوصل لأى نجاح او تطور … بحمد ربنا جدا على وجودهم دائما سند لي و معايا فى اى ايفنت و بوجودهم بقدر انى انفذ اكتر من حفلة او فرح في اليوم ..