إبراهيم فياض 

 الظروف”شروق” شابة مصرية عندها 27 سنة.. بسبب ظروف حياتية خاصة انفصلت عن جوزها وبقت هي العائل الوحيد لأولادهم الثلاثة!.. حِمل تقيل مش أى حد يقدر يتحمله خصوصاً إن “شروق” نفسها لسه في العشرينات يعني.. بس هي قالت لأ.. أنا قدها وقدود..

مفيش شغل بالحلال وحتى لو كان متعب هيبقى عيب.. أنا هشتغل “أسطى نقاش”!.. طبعاً أخدت اعتراضات كتير من اللي حواليها واللي كانوا شايفين المهنة دي مرهقة على واحدة ست بس هي صممت تكمل!.. بس الفكرة إن اللي دايماً بيفكر يشقى ويتعب ويجتهد ربنا بيوقف في طريقه أولاد الحلال عشان كده “شروق” اتعرفت على سيدة اسمها “أم ولاء” هي اللي علمتها أصول الشغلانة لحد ما بقت فيها بريمو زى ما بيقولوا!..

“شروق” بقالها سنتين دلوقتي بتشتغل أسطى نقاش وكل يوم بتشتغل لمدة 12 ساعة متواصلين وكل اللي تعاملوا معاها بيشيدوا بشغلها وجودته وبإخلاصها فيه بشكل أكبر كمان من رجالة أسطوات في نفس المجال!..

تقول “شروق” : (بركب على السقالة وبخلص كل شغلي بأيدي، والحمد لله الزباين مبسوطين من شغلي، ونفسي أربي أولادي وأعلمهم أحسن تعليم وربنا يقدرني على ده، والحمدلله بحاول أعمل كده وبكون ليهم الأب والأم في نفس الوقت عشان يبقوا أحسن مني)..

إنسانة جدعة يا بخت أولادها بيها.. نموذج مدهش بيقول يعني إيه سيدة مصرية، وتقدر تعمل إيه، وإزاى إنها ومهما كان الصعب بتبقى في النهاية قدها وقدود.