بالصور.. والمستندات شقيقية “ايمان” تروي تفاصيل مأساويه في مصر وصولا للهند..

خالد جزر
ما اصعب ان تكون غريبا في وطنك.. عندما تفقد الثقة بابناء بلدتك وتجد ما يحنو عليك ويوعدك بتعويض مافقدته من رعايا صحية وخدمه اداميه وهو شخص غريب عنك وعن وطنك ولغتك، وفجاة تستيقظ علي قابوس مميت. 

الطبيب الهندي ووعود وردية

تقول شيماء احمد عبد العاطى اخت ايمان احمد عبد العاطى الفتاة التي سافرت الي الهند للعلاج من السمنه المفرطه صرحت بانهم تعرضوا لعملية نصب وتضيف من يوم ماعرفنا الدكتور “Muffazal lakdawala” خدعنا كلنا وضحك علينا والعائلة اول زياره ليه ل ايمان يوم 12/1/2017 وعدنا انه لم يترك ايمان غير وهى ماشيه على رجليها وذكرت بان هناك شهود علي كلامها، وكانت المفاجأة عندما صرح فى كل وسائل الاعلام والصحافه ان ايمان مستحيل تمشى على رجليها.

خطأ طبي فادح

وقالت”شيماء” اخت ايمان ان الطبيب الهندي لم يبدأ بعمل علاج مكثف الا بعد مرور 4 ايام متسأله لماذا حكم عليها تفضل كده طول عمرها الكلام ده يتقال بعد سنه علاج طبيعى مكثف خاصة انها بتحرك اطرافها، ذاكره من اول يوم وضح الطبيب الهندي ان اختي عندها جلطه فى المخ ازاى تجيبنى من بلدى لحد مومباى وانت عارف احتمال حدوث جلطه تانيه. او اى مشكله نتيجة النقل وقد كان.

انجاز وهمي 

ايمان من اول ما جاءت جلست 10 ايام بس كويسه وبعدها بتدخل فى غيبوبه بالاسبوع، لان فى كهرباء بتحصل فى المخ او نشاط هما مش عارفين اسبابه الى الان مافيش جهاز رنين مفتوح فى مومباى بالهند، وبعد مافاقت ب 5 ايام تقريبا قرر يعملها العمليه ضغط كله فى وقت قصير اوى عشان يتقال انه عمل انجاز مش مهم بعدها يحصلها ايه،

ظهور الوجه القبيح

وطبعا انا فى الوقت ده كنت واثقه فيهم جدا وفى قراراتهم ماكنتش متخيله ان فيه وجه قبيح همه الماده والشو والاعلام والشهره مش مهم على حساب مين. وان مفيش حاجه اسمها انسان يفقد 262 كيلو فى شهرين ايمان لم توزن اصلا من يوم ما جاءت الى الان وطبعا انا لما قولت ان 500 كيلو كان ميزان تقرببى وفى دكاتره سمنه كتير زاروا ايمان قبل السفر وسالونى وزنتيها قولتلهم تفتكروا ايمان ينفع تتشال بالحجم ده؟

واى ميزان يستوعب حجمها، بناء على ايه الرقم ده اتقال لانها من 3 سنين لما حصلتلها الجلطه اتحطت على جهاز اشعه مقطعيه ووزنت 280 كيلو والفتره الاخيره ايمان حجمها بقى الضعف…ولما جه الدكتور Muffazal lakdwala مصر وشافها على الطبيعه لم يتناقش فى الميزان لان شاف انها بالفعل حجمها ضخم….ولو كلام الدكتور مضبوط فين الفيديو اللى قبل واللى بعد عشان تعرضة للعالم كله.

علاج وهمي 

ايمان مانزلتش اكتر من 60 او 70 كيلو ومعظمهم ميه متجمعه فى جسمها مش دهون ولما رجوناه انه ماينزلش ايمان مصر دلوقتى لان لسه حجمها كبير ولازم تفقد وزن كتير حقيقى مش كلام عشان لو حصلها حاجه بعد الرجوع اقدر اشيلها والحقها اقسم بالله كنت بعيطله وكنت هبوس على ايده قالى يا شيماء ايمان اختك مش هتخس اكتر من 50 او 60 كيلو فى سنه ايمان كان عرضها قبل السفر من الركبه للركبه 130 سم حاليا هى 112 سم مش عارفه ازاى تبقى فقدت كده نصف الميزان وموضوع الكرسى اللى بتتحط عليه ده سرير بيتقفل كرسى عرضه 120 سم يعنى مش كرسى طبيعى اقدر اتحرك بيه واعتقد فى حالات فى العالم مماثله لحالة ايمان بتقعد فى المستشفى اقل حاجه سنه ونص او سنتين مش من اول شهر ونص يقولى خدى اختك وانزلى انت اخدت الشو بتاعك وكل يوم جوايز انك احسن دكتور فى العالم وانك بتصنع المعجزات واستخدمتنا اداة لتحقيق اغراضك ده مايرضيش ربنا.

كذب وتدليس من اجل الشهرة
وتؤكد الدكتور الهندى هو من قام بالبحث عن ايمان وعائلتها عشان يقدم مساعده وبعدها قال للعالم عبر الاعلام كله انى اللى دورت عليه ده على اساس انه دكتور مشهور لدرجة انى عرفته وانا فى مصر..لكن اعتقد دلوقتى هو بقى مشهور جدا بسبب ايمان وبسبب الضحك على الناس وعليا…..فى الفتره قبل السفر جالنا عرض تانى من مستشفى برجيل بابوظبى دكتور Muffazal كان شغال فى مجموعة المستشفيات دى هما تواصلوا معايا وقالولى احنا مؤسسه متكامله وايمان حتقعد مش اقل من سنه ونص تتعالج نفسى وعلاج طبيعى وكل حاجه ومش حنسيبها

وفى يوم 4/2 دكتور شمشير صاحب هذه المستشفيات جه بنفسه لزياره ايمان وكان الدكتورMuffazal معاه وطبعا الدكتور الهندى قابلنى قبل مايجولنا من وراهم عشان يقولى انهم ناس مش كويسه وهمهم الاعلام والشو وحيرموا اختك بعد 3 شهور ومش حيكملوا للاسف انا وامى وثقنا فيه وصدقناه والنتيجه انه من اول ابريل عمال يقنعنى بانى انزل مصر اكمل علاج ايمان ودى مصر وطنى ولازم ارجع بعد ماهو كان السبب فى تشويه صورة الاطباء المصريين فى العالم.

طبيب مصري يكشف خطأ التشخيص 
تواصلت مع دكتور مصرى هنا فى الهند مخ واعصاب وطلبت منه ييجى يشوف ايمان وبالفعل جه وانتظر 3 ساعات لمحاوله انه يدخل يشوفها جابولنا ورقه نمضى عليها اننا مانتكلمش مع اعلام او صحافه ولو ده حصل حنرميلك اختك فى الشارع اقسم بالله هذا حصل والدكتور المصرى كلم دكتور المخ والاعصاب الهندى وقاله فى الوقت ده ان ايمان حالتها اتدهورت والنشاط ده انتقل من النصف الشمال للنصف اليمين ووعيها بيقل .

بنتعامل وكأننا شحاتين
ده غير المعامله انهم بيحسسونا طول الوقت اننا ناس فقراء وجايين نشحت العلاج فى بلدهم مافيش انسانيه مافيش رحمه انا اتخدعت فيه انا بقول الكلام ده وانا وايمان هنا فى المستشفى عندهم مش عارفه ايه ممكن يحصل ولا رد فعلهم حيكون ايه بس عارفه ان ربنا مع ايمان ومعايا وبينصر الحق دايما
ملاحظه فى اطباء كتير محترمين وكلمونى فى مساعدة ايمان قبل السفر بس كانت المشكله فى المستشفى مش فى كفاءة الاطباء
محدش يزايد عليا ويقول انتى اللى رفضتى تعالجى اختك فى مصر انا فضلت لحد اخر وقت منتظره الدوله تعمل حاجه محدش ساعدنا القوات المسلحه جات البيت 3 مرات فى 4 شهور يقولوا حيساعدوا ومافيش نتيجه انا جالى تليفون من الخدمات الصحيه للقوات المسلحه قبل السفر بيوم يقولولى لسه بنجهز المكان….
ايمان مش حتكون ضحية البيزنس والمتاجره بارواح الناس
انا ماليش غرض الحمدلله غير ان اختى تحف ولا بدور على فلوس ولا بدور على انى مشهوره انا كل غرضى اختى تخف واشوفها احسن منى.