تصوير – وليد صلاح
الشاعر وليد المصرى عضو مجلس ادارة رابطة الزجالين وكتاب الأغانى ، عضو مؤسس فريق شبابيك عضو مجلس ادارة فريق الشروق الأدبى
عضو عامل بهيئة خريى الجامعات وعضو مؤسس فريق خرج احساسك ، يكتب قصيد ؛؛الجنية ؛؛ وقام بالقاءها بصالون شبابيك
والله بعوده يا عم جنيه
قوللى حصل لجنابك أيه
رحت فأيه ورجعت فأيه
بعد ما شكلك كله نسيه
طلقناك وما كانلك رده
جيتلنا مكسى ومطلى بفضه
قلنا نحطك يوم فى الرده
لقيناك أسخم ماللى عليه
كنت زمان لك هيبه وشامخه
تدبح عشرة اتناشر فرخه
فجأه باقيت دالوقتى بشرخه
وشرخك فيه اللى مكفيه
كنت بتقطع رطل اللحمه
وقت ماكانت آمله ووحمه
روح مايجوزش عليك غير رحمه
بعد الفاتحه دا لو كان فيه
كنا بنص بريزة بحالها
ممكن نعزم ناس بعيالها
واللى يفيض من بركة حالها
بيودينا الشانزليزيه
فين أيامك ياابو 100 قرش
كنت معلم يوم و بكرش
لو عن حالك نعمل سيرش
مش هاتجيب شيبسى وكاراتيه
أيه اللى جرالك بس ونابك
ياللى مشمت فيك اصحابك
فقت رجعت و بعد غيابك
لسه مازال الوضع عليه
نعمل حضره تكون مخضود
ولا بنظرة عين محسود
ولا الكارثة تكون معقود
أو مربوط على ربع جنيه
شوفلك حل فى نفسك جايز
تصبح ع اللى ينافسك فايز
ولا هاتفضل دايمآ عايز
حد يقولك ماادرك أيه
صحصح ولا هاتفضل نايم
إنت غرقت ماكنتش عايم
وطنك مش محتاج لعزايم
قد ماكان عايزك تغنيه
كنا نحبك ترجع سالم
بس ازاى ومنين يا عالم
حظك لو كان حظ عوالم
كنت غازيت العالم بيه