كتب الرائد” خالد أبوبكر” مؤسس الجيش الإلكتروني وضابط الشرطة السابق رأيه  شديد الأهمية بعد الحادث الإرهابي صباح اليوم في سيناء علي صفحته علي الفيس بوك حيث قال:تعليقي علي حادث العريش الارهابي و بصراحه ما كنتش عاوز اعلق ولا بالسلب ولا بالايجاب لان بأمانه كفايه اللي ابطالنا فيه مش ناقصين كمان خوابير و فتايين و محللين و مهما الواحد قال او مهما كان عمل للبلد دي فهو مجرد ” قزم ” بجانب ابطالنا اللي سايبين اهاليهم و بيحاربوا هناك و بيتصابوا او بيستشهدوا علشان يحافظوا علي عرضي و ارضي و عيالي , بس بصفتي كنت شغال في الامن المركزي و رحت ماموريات كتير في سيناء و شفت بعيني الوضع هناك و بصفتي معايا فرق تدريبيه في حراسه المنشئات و الشخصيات و الكماين في مصر و من بره مصر فحسمح لنفسي أقول مجرد رأي صغير في الحادث ده من واقع خبرتي و علمي و عملي .

اولا : غلط جدا الكماين الثابته في هذه الاوضاع لانها عباره عن مصائد لقواتنا يقدروا الارهابيين يهاجموها في اي وقت سواء بعربيات مفخخه او مترجلين و طبعا عنصر المفاجئه في صالحهم تماما مهما بلغ الحذر و الحيطه و اليقظه و مهما كان عدد او قوه الكمين , القيادات الامنيه للاسف كل همها تواجد الكماين لاثبات السيطره علي الارض و ده ثمن بيدفعه للاسف ضباطنا و افرادنا من دمهم رغم امكانيه تلافي الاضرار دي بس طبعا الراي الاول و الاخير للقيادات و يجوز هم شايفين حاجه احنا مش شايفينها و برضه حرجع و اقول ربنا يكون في عونهم في حربهم الضروس دي و اكيد احنا مش اكثر منهم وطنيه و كفايه تضحياتهم هم كمان .

ثانيا : انا شايف ان وجود الامن المركزي و الشرطه حاليا في العريش غير مناسب من الاساس لانهم بيخوضوا حرب ضد تنظيم قوي و ممول كويس اوي و بسلاح ثقيل ولا تدريبهم ولا تسليحهم يسمح و المفروض الاعتماد كليا علي القوات المسلحه الباسله في هذه و المهمه و لحين تطهير سيناء تماما من الارهاب .

ثالثا : مش حقدر اخبي ولا انكر زعلي و غضبي الشديد لما حدث اليوم و ده لان العمليه تم تنفيذها بسياره مسروقه من اسبوع و ده يعتبر سقطه و تقصير فاضح بمعني الكلمه و بصراحه مش حقدر اسامح المقصر و حعتبر ان دم رجالتنا في رقبته و ده لاني عرضت امر تزويد السيارات الحكوميه و فناطيس المياه باجهزه GPS رخيصه الثمن مش حتكلف 100 دولار و عرضت الموضوع ده للاسف مليون مره علي قيادات سواء امنيه او عسكريه و للاسف مفيش فايده و مفيش استجابه لدرجه ان الواحد خرج عن شعوره و حس ان فعلا فيه حاجه غلط و دي حاجه فعلا احزنتني و خلتني احس ان فيه اهمال و ان اللي بيواجه الارهاب موظفين معندهمش اي فكر او ابداع في حرب مع فصيل بيعتمد اعتماد كلي علي حرب شوارع و حرب مخابراتيه تعتمد علي العقل و المراوغه و الذكاء .

* تخيل معايا كده ان العربيه المفخخه بتاعه النهارده دي كان راكب فيها GPS كان اللي حيحصل يوم ما اتسرقت الارهابيين و هم واخدينها للوكر بتاعهم علشان يفخخوها كان الامن بمنتهي البساطه عرف فين الوكر بتاعهم و كان صفاهم كلهم قبل حتي ما يفخخوا العربيه دي و الحادث ده ما كانش حصل من الاساس و منعنا ازهاق ارواح ابطالنا و حسره اهاليهم عليهم و حسره مصر كلها و كان الموضوع تحول لانتصار علي الارض خصوصا ان الارهابيين بيعتمدوا اعتماد كلي علي العربيات المفخخه اللي للاسف لما بتنفجر بتخلي الكمين كله عاجز عن الرد من فرط قوه الانفجار .

الله يرحمهم و يخلي كل ابطالنا و ينصرهم و ينصر مصر في الحرب القذره دي يا رب و عاوز اوجه رساله للارهابيين ان 6 سنوات هي عمر الحرب دي الجيش و الشرطه ما خلصوش ولا يأسوا بالعكس ده عدد الشرطه زاد مش اقل منن 10 الاف ضابط شرطه و زيهم ضابط جيش و بعد الخسائر اللي تكبدها جيشنا و شرطتنا في المعدات عدد المدرعات زاد اضعاف ما قلش و حتي الشهداء من الجيش و الشرطه كسبوا الجنه و مصر و المصريين زادوا قوه و صلابه و ترابط و التفاف حول بلدهم اكتر ما كنا حتي نتخيل , تحيا مصر رغم عن اي قوه , تحيا مصر رغم عن اي حاقد , تحيا مصر مرفوعه الهامه ابيه قويه جميله و يحيا شعبها العظيم مسلمين و مسيحيين , جهله و متعلمين , سيدات و رجال و اطفال و شباب .

بعشقك يا بلدي و عمري فداكي