الغربيه – هاني حسين
في امسيه شعريه تسعد النفوس التقينا بالشاعر والسينارست مجدي ابو النوارج يتحاور مع البيان ويقدم قصيدة متلومنيش، من ديون وجع الروح .والتي حصل بها علي المركز الاول علي مستوي الجمهورية.
متلومنيش
لو شوفتيني
في شكل خواجه
او عيل سيس
ع الكورنيش
او عايش ومشاعري
في تلاجه
أو لابس قفطان
درويش
او بضحك وبكل
سذاجه
وانا دمي نازل
تراطيش
او بلعب أو أتشاقه
عسكري هربان
م الجيش
منا مبقتش
فاهم حاجه
مقطوع نفسي
يادوب تناتيش
ناهش فيا
فقر الحاجه
منا ديك بيأذن
ميصليش
مشنوقه يابطني
ومش محتاجه
نايمه بتحلم
ريحة العيش
لو شفتيني
وانا بتماده
بضحك اهيس
مع حرافيش
متلومنيش
خطفاني الغربه
فيك بموت
دايب عضمي
مبيشلنيش
شجرتك عاليه
وانا مسخوط
فروعك مايله
للألضيش
خلص دودك
ورق التوت
وانا متشرنق
مبشوفنيش
ولا بسمعلي
حتى ف صوت
ولامسمحولي
اتنفس اعيش
منا مكتوبلي
اشبع ف الموت
فرحك خيرك
عز مليش
جوه الهم
بقيت منكوت
بصرخ وازعق
مسمعنيش
واصبر نفسي
واقول مبسوط
وانا جوايه
النبض مفيش
روحي تلومني
كفن مشحوت
وحق الدفنه
خدوه بقشيش
ناس تلمحني
وبتتشفه
كأني يهودي
م الدواعيش
وناس هتقول
اهو غار وبتفه
وسلخ ف جلد
ونتش الريش
قلبي ف كفه
جسمي ف كفه
روحي خلاص
مبتقبلنيش
لا عايز شمسك
ولا هتدفه
وان يوم كلمنك
مترديش
هخرس خالص
منا بتصفه
هلبس وأقلع
في الطرابيش
وامثل دوري
عبيط ف الزفه
كدا كدا ميت
ميلزمتيش
مش عايز منك
حتى الفاتحه
وإن شوفتي
جنازتي متصليش
كفايه اموت
في ترابك منسي
اكتب في تابوت
واحفر خرابيش
كلامي المكتوب
على وش الورقه
لحظة ضعف
متلومنيش
عاشقك موت
وإن لومت
بحرقه
متصدقنيش