أيها المسؤولين رحماكم بالشعب ،
مقال بقلم : مهندس أحمد حجاب
احنا فى زمن كل مسؤول يعمل ميديا ومهرجان اعلامى ودعائى يلمع به نفسه !!
أول حاجة يعملها المسؤول يخصص موظفين من الذين يتقاضوا رواتبهم من الضرائب اللى يدفعها الشعب – أو من صناديق الجباية الخاصة اللى بيحصلوها من الشعب وتسمى ( الصناديق الخاصة ) كل مهمتهم فتح صفحات على الفيس بوك وتويتر لتلميع المسؤول وليس لتلقى شكاوى واقتلراحات المواطنين – بدليل ان كل هذه الصفحات الحائط لها مغلق – يعنى متقدرش تكتب أى اقتراح أو شكوى على حائط الصفحة !!!!
كمان لو وجدت مكان التعليقات مفتوح وعلقت تعليقات متكررة ومش عجباهم يحذفوا تعليقاتك ويقفلوا خانة التعليقات عليك فلا تستطيع تكتب على الصفحة ولا تستطيع تعلق على تلميعة عاملينها للبيه المسؤول بالصور !!!!
مفيش حل غير انك تروح للرسائل بتاعة الصفحة علشان ترسل اقتراحك أو شكوتك لعلها تصل للمسؤل تجد الرسائل أغلقت !!!! ليه كده لأنهم أنشأوا الصفحات دى على فيس بوك وتويتر لتلميع المسؤول حتى لو دخل الحمام يكتبوا أنه دخل الحمام الساعة كذا وخرج الساعة كذا وملحقش يعمل حمام علشان مستعجل لرعاية مصالح الشعب رعاية كاملة !!!
طيب الرعاية الكاملة يا حضرات المسؤولين واللى كانت ضمن القسم اللى أقسمتم عليه ان حضرتك تسمع شكوى المواطنين أو اقتراحاتهم يمكن الراجل ده بيبلغنا عن فساد أو شيىء فى الصالح العام أو بيساهم معنا فى حل المشاكل يبقى كتر خيره !! الا أبدا عندهم الأهم تلميع المسؤول وهما عاملين الصفحات دى علشان القيادة السياسية تتابعها وتقول على المسؤول دا هارى نفسه فى الشغل ويا عينى رجليه ورمت من اللف على رعاية مصالح المواطنين !! – تيجى انت تبوظله التلميعة بتعليقاتك بالنقد واظهار السلبيات يبقى الصفحة مش للتلميع بقى دى هتظهر عيوب المسؤول وسلبياته !!!!
أيها المسؤولين رحماكم بالشعب وكفى تلميع فى أنفسكم وافتحوا حوائط وتعليقات ورسائل الصفحات التى أنشأوها من يتقاضون رواتبهم من دم الشعب لتتلقوا عليها الشكاوى والمقترحات وتهتموا بالرد عليها ردود عملية تشفى غليل صدور الشعب فقد فاض الكيل بهم وأعلموا ، أن الأهم اطلاع الله تعالى على أعمالكم فانه الذى سيجزيكم عنها ان كان خيرا فخير وان كان شرا فشر ،،