كتبت:آية فتح الله

في الفترة الاخيرة شوفنا نماذج كتير جدا عن التنمر للأسف أثرت بشكل سلبي علي صاحبها اسوأ نتيجة سمعت عنها هي أنتحار أشخاص تاركين رسالة بيقولوا فيها انهم اتعرضوا لأسوأ انواع التنمر من أصدقاءهم او الناس اللي حواليهم وهم عاجزين عن التصدي لكل دا فانتحرروا …

مبدأيا لازم أسال نفسي سؤال هل أنا متنمر ؟!

طبعا محدش بيسأل نفسه السؤال دا علشان غالباً قليل اللي بيعاتب نفسه أو بيغلط نفسه وبيعترف بدا … علشان تعرف تجاوب علي السؤال دا فكر في كل تصرف عملته علي مدار اليوم فكر في هزارك مع صاحبك لما شفت صاحبكم التالت جي وانتوا استلمتوه من ساعة ما جه هزار وسخرية علي كل حاجة بيحكيها او مشكلة هو مش لاقيلها حل ..” انت غبي اذاي تتصرف كدا ..ياعم كنت قلي قبل ما تتنيل تقولها ..انت مش هتنجح ف حاجة أصلا اخرك تقعد معانا عالقهوة وتروح تحلم ..ايه القرف اللي انت لابسه دا دا من ايام الستينات ” .

أو مثلا لما تتعامل مع حد شغال عندك انت قصدك تعلمه بس طريقتك ف المعاملة معاه شكلت فجوة بينك وبينه وبقا يعتبرك عدوه الأول وأنت مش حاسس .

وأنت قاعد في فرح حد وقاعد مش عاجبك اي حاجة لا العريس ولا العروسة ولا الأكل وقاعد شغال تعييب علي كل حاجة او شايف ان العريس كبير سناً عن العروسة وبتقول حرام ايه اللي خلاها تقبل به ؟!

بنت قررت تتقدملها اوعي تخطبها الا لو كنت راضي عن كل حاجة فيها بجانب شخصيتها – شكلها –لبسها – شغلها لانك ببساطة لو مش قابل حاجة في دول هتحاول طول الوقت تكرهها في حياتها وتفقدها الثقة ف نفسها والكلام دا كمان للبنت ..

متسألش حد أسئلة ميعرفش يرد عليها بحجة أنك عايز تتطمن عليه ونفسك تفرحله زي مثلا أنتي متجوزتيش ليه؟ – أنتي رفعتي كدا ليه بياكلوا أكلك؟ – مش هنشيل عيالك ولا ايه؟ أسئلة كتير حاول تبعد عنها ومتسألهاش لحد انت اكيد مش هتعرف مصلحة شخص أكتر منه .

متعيبش علي شكل حد ولا علي لبسه ولاعلي بيته أو علي زوقه حاول توفر النصيحة ديه لنفسك ومتدخلش الأ لو الشخص دا طلب رأيك أو بيحب زوقك في قوله بأدب .

السوشيال ميديا علي قدفوايدها وقوتهاالا انها ليها أثر سلبي جداً لأشخاص كتير زي مثلاً فضيحة فلان بلاقي كل السوشيال نشرت الخبر رغم أنك بتساهم في فضيحة شخص الله أعلم هل فعلا صح ولا غلط الفعل اللي عمله أو تاب عنه مثلا وربنا سامحه … انت ساهمت في الفضيحة ديه لانك ببساطة مش متخيل أنك ممكن تبقي مكانه مع أختلاف المواقف .

حاجات كتير بتبقي عاجباك ويجي غيرك يعيب عليهم بتكرهك فيها اكيد حصلت معاك .

أشكال التنمر ياما يمكن أنت مش عارف انك من الأشخاص اللي بتتم علي ايده وهو مش حاسس ..

تعالي نيجي لبعض الأسباب اللي بتخلي البني أدم دا متنمر وممكن غالباً يبقي معترف بدا ومش زعلان من دا..

أولهم “عدم ثقته الكافيه بنفسه” يعني الشخص دا عايز يلفت نظر اللي حواليه لما يظهر عيوب غيره ويحرجهم علشان يظهر أنه هو اللي مفتح ومش بيغلط غلطة – جايز جدا يكون أتربي تربية غير سوية خليته كدا زي مثلا والده يقوله انت حمار مبتفهمش لو مستواه مش كويس في الدراسة او انه يشوف احد والديه بيتنمر علي جارهم او حد في الشارع أو حارس العمارة وبيزعقله .. ممكن كمان المتنمر دا يبقي غيران من اللي حواليه شايفهم دايهم احسن منهم وهو مكانه فبيضطر أنه يطلع “القطط الفطسانة” زي مابيقولوا في غيره علشان يبقي فيه حاجة بتميزه قدام غيره انه مفيهوش الحاجة ديه .

لو عندي صاحب مثلا أو حد قريب منك بيقعد يسخر من اللي حواليه وبيحرجهم أو شخص بيتنمر عليك وشايف نفسه عليك اذاي أتعامل معاه ؟

1-أول حاجة لازم لما يجي يكلمك كدا متديهوش أي أهتمام بمعني متردش عليه وكمل كلامك عادي مع الباقي.

2-أهتم بكل شخص قاعد معاكوا الا هو

3-حاول متدخلش معاه في خناق او صدمات ومتردش الاهانة بأهانة تانية لانك ببساطة هتتحول تبقي زيه ويبقي كسب دا .

أتمني يكون المقال البسيط دا خلاك تفكر شويا في أفعالك ومن كل حرف بتقوله أدام شخص أو من ورا