بقلم /صفاء احمد اسماعيل
ياولدي يانور عيني
محتاجه حضنك يدفيني
محتاجه ليك تقوم ترميني
دا انا عمري في يوم ما زعلتك
انا اللي في بطني حملتك
تسع شهور ورضعتك
وما كنتش بانام لأجل راحتك
انت مش فاكرني يا بني؟
دا انا أمك. …
يابني محتاجه الدوا
ولقمه حلوة ناكلها سوا
ومعاش أبوك هنقسمه سوا
واهوة منه هاتلي الدوا
والموجود هناكله سوا
يا ابني نفسي تاخد بيدي
وتمسح دمع خدي
نفسي اشوف ولادك مرة عاندي
ولا أقولك خد كل اللي عاندي
انا عاندي يابني خاتم في يدي
شايلاه للعوزة
بس يا ابني اوعي تشرب بيه شيشه
كان نفسي أشوف معاك شهادة
وافتخر بيك كالعاده
أبوك ما كانش حيلته حاجه
مات وسابك في الشهادة
كنت باشتغل ليل نهار
وأديك المصروف بذياده
وأقول بكرة ابني ياخد احسن شهاده
دلوقتي يابني مستقبلك ضاع كالعادة
بص لزمايلك قاعدين في المكاتب
طالبين قهوة سادة
وانت حتي ما عاندكش سكر زياده
التعليقات