كلام في صلب الموضوع ‏عن السوشيال ميديا وحياة الإنسان الذي تحول إلي كيان واهي
السيوشيال ميديا هي التي دمرت علاقتنا مع ناس كتير وخصوصا أقرب ناس لينا ونهاية علاقتنا بتنتهي ببلوك ، خلت نبرة صوتنا ملهاش اي لازمه وتعابير الوش عباره عن شوية إيموشنز وكلها نفاق في نفاق ، بوظت علاقات الأصحاب بأتفه الأسباب

‏علشان واحد بيرد متأخر وهو أونلاين او بيعمل seen ومايردش وبقت خروجاتهم انهم يفضلوا ماسكين الموبايلات في نفس المكان وخلاص ومن غير ما يتكلموا ويضحكوا زي الأول ، وخربت علاقه الام ببنتها وابنها علشان شايفاهم طول الوقت مشغولين وبعاد عنها .

‏بقت مشاكلنا عباره عن بوست ورد الناس ومساعدتهم لينا بقت لايك وكومنت وشير ، السوشيال خلتنا بنحكم غلط على ناس كتير ونخسرهم لأننا بنشوف غلط .

‏السوشيال خلتنا نكذب على نفسنا وعلى الكل وبقوا دلوقتي يصدقوا اللي بتقوله في بوست او تويته مش اللي باين علي وشك .

محدش بقى فاضي يسمع لحد ، أو يعزمه على فنجان قهوة يقدر أنه يسمعه ويفهم مشاكله وجهًا لوجهه ، العلاقات كلها بقت مزيفة والسوشيال بالرغم أنه أصرع في الوصل لأي مكان وفي أى وقت بس للاسف خلانا نفقد المشاعر الصادقة والوضوح ومعانى كتير جدًا وللحديث بقية في السيوشال ميديا والعالم الواهي